Матенаькъан Ӏаббаса Илез

Матенаькъан Ӏаббаса Ильяс
Матиев Ильяс Аббасович
Ваь таьрахь	5 оагӀой 1985(1985-12-05) (40 шу)
Ваь моттиг	СурхотӀе, Наьсарен шахьар, ГӀалгӀайче, Эрсече
БӀорахол	Россе Федераци
Леладу гӀулакх	прозаик, оазархо, хоамбоаржабархо, таржамхо, хоамбаржархо
Кхолламаш даь шераш	2008 шера денз
Лостам	публицистика, исбахьален литература
Жанр	статьяш, дувцараш, фаьлгаш, оазараш
Кхолламий мотт	гӀалгӀай, эрсий
Дебют	2008, «Сердало» газет, байташ

Матенаькъан Ӏаббаса Илез, иштта Ильяс (эрс: Матиев Илез Аббасович) — гӀалгӀай хоамбоаржабархо, йоазонхо, оазархо, таржамхо, юкъарлен къахьегамхо, иштта радиоболхло, диктор, цул совгӀа тӀоговзанча.

Вахара сурт оттадар

Дешар

Матенаькъан Илез ваьв 1985-ча шера оагӀой бетта 5-ча дийнахьа СурхотӀа. Цун да́ Матенаькъан Ӏумара Ӏаббас цӀихеза гӀалгӀай йоазонхо ва. СурхотӀарча ишколе дийшад (1991-2002 шш). Цхьацца йоазонаш 8-гӀча класса хана денз деш хиннав. Ишколе деша вагӀаш наьна меттахи литературахи ишколерча яхьашка да́къа лувцаш толамаш даьхад цо.

Ишкол яьккхача ГӀалгӀай паччахьалкхен университете деша вахав химе-биологен факультета «Хими» яхача даькъе. ЦхьоалагӀа курс ма яьккханге цигара хьа а ваьнна технологе-педагогикай факультете заочни деша волавеннав («Технология и предпринимательство» яхача метте). 2009 шера из яьккха а яьккха, 2010-ча шера лакхерча дешарче шозлагӀа вахав: филологен факультета «Эрсий мотти, эрсий литературеи. ГӀалгӀай мотти, гӀалгӀай литературеи» Ӏомадеш. 2016-ча шера из дешар а чакхдаьккхад цо.

Болх

2004-2010-ча шерашка цхьан гӀишлонхой организаце тӀоговзанчалла болх баьб. 2006-2010-ча шерашка СурхотӀарча кхоалагӀча школе лакхерча классашка багӀачарна эзделах лаьца хьехараш деш болх лелабаьб. 2013 дешара шера Магаса цхьоалагӀча лицее гӀалгӀай мотти литературеи хьехаш хул.

2010-2015-ча шерашка «Ангушт» радио тӀа «Наьна мотт» яха хьокхаче хьош къахьийгад, вешта диктор а, тоадерхо-корреспондент а хиннав. ГӀалгӀай мехка бахархошта Ильяса цӀи эггара хьалхагӀа хаза йолаенна ха я радио тӀа яьккха́р. 2010-ча шера лайчилла беттагара денз 2012-ча шера аьтинга беттага кхаччалца «Маьл» яхача дикача Ӏамала фонде лаьрххӀа вола корреспонденталла лийнав, карарча хана «Маьл» яхача фонда попечительски совете да́къа лоац.

2012-ча шера денз вай ханнолца «Эздел» яхача культурно-просветительски юкъарче доакъашхо ва, цига цхьацца проекташ дӀахьош новкъостал деш ва.

2014-ча шера маьтсела бетта 10-ча дийнахьа денз АьрхӀий цхьоалагӀча денга кхаччалца йола ха Оахарганькъан ЧхьагӀий цӀерагӀа йолча Ӏилман-тохкама института болхло волаш яьккхай фольклореи этнографени ралса чу.

2014-ча шера денз 2016-ча шерага кхаччалца КъТРК «ГӀалгӀайче» ши хьокхаче дӀахьош хиннав. 2012-2013 шерашка «Ингушетия» (ГӀалгӀайче) яхача газете контракта статьяш язъеш ха яьккхай, 2013-2015-ча шерашка — иззамо гӀулакх «Сердало» леладаьд, вешта-м цун йоазонаш 2008 шера денз хӀанз а арадувл цига. 2015-ча шерагара денз газета бехктокхаме волча секретара дарже ва.

Цул совгӀа, «Эздел» яхача культура-сердалъялара юкъарче берий киношкара турпалашта оаз юлаш болх бу. Иштта, 2018-ча шера «Лом паччахь» яхача фаьлга Тимона а́мал ловздаьд, хӀаьта 2020-ча шера «Мадагаскара» Джулиан паччахьа́ оаз еннай. 2021-ча шера денз «Майра кӀант» (эрс: Отважный джигит) яхача берий сериала чу массехк турпала амал ловзадеш ва. Ца хана денз Безликие яхача проекте цу тайпара фаьлгаш гӀалгӀай меттала доахаш болх беш дукха фаьлгаш арахийца ва.

Дезал

Саг йоалаяь ва. ВоӀ кхевеш ва.

Кхолламаш

• «Дувцараши фаьлгаши»
• «Коа тӀара хьайбаши олхазараши»
• «ГӀалгӀай ага иллеш»
• «ГӀалгӀай меттала бӀаь дош»

ТӀатовжамаш

• Евлоева Зарема. Къаман библиотека болхло // «Сердало», № 33
• «Сердало» газета коллективах лаьца Архиве диллад 2021 шера тушола 3 дийнахьа..