Албаканаькъан МурцаӀалий Жабраил

Албаканаькъан МурцаIалий Жабраил
Албаков Джабраил Мурцалович
Ваь таьрахь	2 бекарга 1940(1940-04-02)
Ваь моттиг	ГIалмисте, ГӀалме шахьар, Нохч-ГӀалгӀай АССР
Кхелха таьрахь	5 ардара 1968(1968-10-05) (28 шу)
БӀорахол	СССР
Леладу гӀулакх	оазархо
Лостам	исбахьален литература
Жанр	оазарле
Кхолламий мотт	гӀалгӀай

Алба́канаькъан МурцаӀа́лий Жабра́ил (Джабраьил) (эрс: Албаков Джабраил Мурцалович) — гӀалгӀай оазархо ва.

Биографи

Албаканаькъан Жабраил ваьв 1940-ча шера бекарга бетта 2-гӀча дийнахьа ГӀалмисте. Диъ шу даьнна кӀаьнк хиннав из 1944-ча шера гӀалгӀай къам мехках доаккхача хана. Цун бера шераш дӀадахад, СибарегӀа бала а хало а ловш. Дешар ГӀиргӀизой мехка дӀадола а даь, цигга юххьанцара ишкол яьккхай цо. 1957-ча шера ГӀалгӀайче ше ваьча ГӀалмисте цӀавеначул тӀехьагӀа, цо дийша чакхъяьккхай юкъера ишкол. Цул тӀехьагӀа из Шолжа-ГӀала тӀарча хьехархой института кийчон отделене деша эттав из. 1959-ча шера Нохч-ГӀалгӀай хьехархой института тархьара-филологен факультете дӀахо дешар дӀадехьад Жабраила. Цу факультете дешаш волча хана, оазарленцара хьашт совдоал цун. Байташ язъе а сурташ дехка а из дуккха хьалха, берий шерашка, волавенна хиннав.

Албаканаькъан Жабраила болх баьб Гадаборшакъонгий-Юрта юкъерча ишколе хьехархо волаш.

Лазари валари

1957-ча шера из ГӀиргӀизехьара Кавказе цӀавоагӀача хана, цунца цхьан цӀермашен чу нийсбенна хиннаб Дошлакъий-Юртара гӀалгӀай, шоай берашца цӀабоагӀаш. ЦӀермашен сеца́ча юкъа хьогденнача берашта хий эца дагахьа араваьннача тӀехьависа хиннав из. Шийлача, цӀайзача цу Ӏан дийнахьа дарзах удаш, халла тӀехьакхийнав из, хӀаьта, тамбура чу шелваларо кхетам чура ваьккхав из. Цул тӀехьагӀа гучадаьннад тӀехкий хоттамашта хула а́ний хьувкхе́р. Ийс шера из лазар ловш хиннав Жабраил, юххера 1968-ча шера ардара бетта 5-гӀча дийнахьа цу лазарах веннав из.

Кхоллам

Ший байташ араяха из волавеннав 1960-ча шера. Уж каст-каста кепатохаш араювлаш хиннай «Сердало» газета тӀа а «Лоаман Ӏуйре» альманаха тӀа а. 1967-ча шера Нохч-ГӀалгӀай дешаргий зарбанчено кепатеха арабаьккхаб «Наьна кулгаш» яха оазархочун байтий гуллам. Цунна юкъеяхай тайп-тайпарча тематиках йола байташ. Иштта арадийнад дӀахо кхыдола балхаш: 1969-ча шера — «ГӀалмисте», 1985 шера — «Лоамашкара мух», 2003-ча шера — «ГӀалгӀайче, хьо еза сона» (поэт кхелхачул тӀехьагӀа). Иштта цун стихаш юкъеяхай гӀалгӀай поэзен антологена а.

Белгалдаккхар

Комментареш

Хьасташ

Литература

• Евлоева А.М., Мартазанова Х. М. ХӀанзара гӀалгӀай литература / Сост.И.А.Дахкильгов. — Нальчик : Республиканский полиграфкомбинат им. Революции 1905 г.», 2011. — 423 с.

ТӀатовжамаш

• Оздоева М. С любовью к жизни (эрс.). газета «Ингушетия».