Урдуви Тамареи

Урдуви Тамареи
Жанр	поэма
Яздаьр	Озанаькъан ИсмаӀалий Салман
Оригинала мотт	гӀалгӀай
Яздаь таьрахь	1924
Юххьашха кепатеха таьрахь	1924

«Урду́ви Тама́ре́и» (эрс: Калым и Тамара) — 1924-ча шера язъяь йола Озанаькъан ИсмаӀалий Салмана поэма. ГӀалгӀайи нохчийи метта хьалхара поэма я. Цу тӀа автора тӀахьехам бу халкъага дӀаяхача замах къовсам лоаттабараи лоаман кхалсага маӀача наха нийсса бокъонаш хилийтараи.

Поэмах лаьца

Цу поэмах лаьца Нохч-ГӀалгӀай университета доцент волча В.Б.Корзуна яьздаьд: «20-гӀча шерашка кепа теха араяьннача произведенешта юкъе къаьстта белггала я Озанаькъан Салмана «Урдуви Тамареи» яха поэма. Цо тешал ду кердача советий заман хьалашка, ший безам хуле, гӀалгӀай Ӏадаташца лоаттабеча къовсаме котъяла тарлу кхалсаг».

«Урдуви Тамареи» яхача поэмас шийна йоагӀаш йола моттиг  яккхай гӀалгӀай литературе. Поэма тӀа дувцаш дола хӀамаш дуккхаза нийсденна хиннад гӀалгӀай халкъа вахаре. Ха  дӀа мел йода хувцалуш хьаденад гӀалгӀай къаман вахар. Хувцалуш хьаденад из мехкарий а. Цудухьа 1958 шера кердаяккха хиннай из автора а. Фатем яхаш хинна поэма турпалхочун цӀи Марем, аьнна хийцай автора.

Озанаькъан Салмана язъяь «Урдуви Тамареи» яха поэма нохчий а гӀалгӀай а литературе эггара хьалхара хилара тешал ду нохч-гӀалгӀай литератораша. Йоазонхочун Пхьилекъонгий Махьмад-СаӀида 50 шу дизара хетаяьча юбилее белгалдеш дувцар. Масала, нохчий йоазонхочо Суланаькъан Мамеда яьхад: «Фу бахьан белгалву аз Озанаькъан Салман? Нохчийи гӀалгӀайи йоазонхоех эггара хьалха цо поэма язъяь хиларах». ХӀаьта Нохч-ГӀалгӀай Университета литература кафедра доцент хиннача В.Б.Корзуна яьхад: «Озанаькъан Салмана «Урдуви Тамареи» яха поэма Нохч-ГӀалгӀай литературе гучаянна хьалхара произведени  я».

«ГӀалгӀай хьалхара сюжетни поэма язъяр Озанаькъан Салман ва. Цун цӀи «Урдуви Тамареи» яр. Цу тӀа бувц гӀалгӀай кхалсаг дӀа яхача заман тӀехьадисача гӀулакхех мукъаяларах бола никъ». Из йоазув даьд профессора Дахкилганаькъан Абдурахьмана ИбрахӀима «ГӀалгӀай литература» яхача 9-гӀча класса Ӏаморга тӀа.