Масжид ан-Набавий

Ло:Мечеть Аль-Масжид ан-Набавий, е Пайхамара маьждиг (да) (Ӏар. المسجد النبوي‎ — Мечеть Пророка‎) — Мадданера маьждиг. Бусалба дин чу, дозалага дилача, Пайхамара маьждиг шоллагӀа доагӀа, Маккарча Хьарам-маьждига тӀехьеи, Байтулмакъдисе доалача Акъса маьждигал хьалхеи. Мухьаммад Пайхамар, Даьлера салоти салам-моаршали хилда цунна, дӀавелла́ воалл цу маьждиге.

Тархьар[тоаде | тоаде чура]

ХӀижрат даьчул тӀехьагӀа Мухьаммад Пайхамар, Даьлера салам-моаршал хилда цунна, Маддане Ӏохайнав, цу хана Ясриб яхаш хиннай из. Цига Цо а цун асхьабаша а, АллахӀ раьза хилва царна массаненна, цӀенош детта́, цӀеношта маьждиг хьатӀаде доладаьд. Пайхамара, Даьлера салам-моаршал хилда цунна, ше а да́къа лаьцад маьждиг хьалдеш. Хьалдетта́ хиннача маьждига хьалхашкеи тӀехьашкеи бӀоагӀий доахка отараш хиннад, юкъе тхов тӀабоаца ков хиннад. Шоай цӀеношкара маьждиге дӀачубувла йиш йолаш хиннаб Пайхамара а, Даьлера салам-моаршал хилда цунна, (истий цӀеношкара), цун цхьабола асхьабаш а шоай къаьстта́ цӀи йолаш хиннача наӀарашка гӀолла. ТӀехьагӀа асхьабашта юкъе Абу Бакраяр мел йоацар дӀакъайлийта́ хиннай Даьла Элчано, Даьлера салам-моаршал хилда цунна. Пайхамар, Даьлера салам-моаршал хилда цунна, вала ма веллинге, цун сесаг Ӏа́ишата цӀагӀа дӀавелла́ хиннав из, тӀехьагӀа Абу Бакр а, ХаттӀаб воӀ Ӏумара дӀабийхкаб цунна йисте.

Цул тӀехьагӀа масайттазза тоадеш, шердеш хьаде́над маьждиг, кастта Пайхамари, Даьлера салам-моаршал хилда цунна, бакъ хинна вола хьалхара ши халифи, Даьла раьза хилва царна, воалла Ӏаишата цӀа чу а лоацаш, хӀаьта цу цӀен тӀа баьццара чаьтар детта́ хиннад, вай хана маьждига эггара чӀоагӀагӀа йовзаш йола белгало я из^[1]. Чаьтар маца даьд тешшаме ховш деце, а, XII бӀаьшу долалуш даьча йоазонашка хьоахадаь да из.