Лорса Лида

Кечал я укхазара: Википеди
Перейти к навигации Перейти к поиску

«Хье йоа́гӀе яде́ йо́ла», «Йо́ла со́га», е на́ха́ юкъе яьржа́ цӀи «Лорса Лида» — гӀалгӀай иллиалархочо Хамхой Ахьмада 1936 шера язъяь йола йиш, тӀехьагӀа халкъа йиш хинна дӀаяхай.

Лорса Лида

Лоаманцара лаьча дека ма ала сога,
Хеначара кукала кхайка ма ала сога,
Вахачара дӀа цӀа воха ма ала сога,
Хье йоагӀе яде йола, ва, Лорса Лида.

Колхоза зама хьаэттай вайна,
Цунца вай боахамаш тоалуш да вайна.
Колхоза бешамаш хьувкъаш я вайна,
Хье йоагӀе яде йола, ва Лорса Лида.

Киса леха зама дӀаяьннай вайна
Урдув тела зама дӀаяьннай вайна
Киса дуза зама хьаяьннай вайна,
Хье йоагӀе яде йола, ва, Лорса Лида.

Дода хи-тоатол мо со сиха ва хьона
Из яьнна буц мо со дукха ва хьона
Хьо мел кхаьчача хургволаш ва хьона
Хье йоагӀе яде йола, ва, Лорса Лида.

Ӏа яхар дац хьона, ва, Лорса Лида.
Хьона хетар дац хьона, ва, Лорса Лида.
Сай сил дукхагӀа хьо еза сона,
Хье йоагӀе яде йола, ва, Лорса Лида.

1936 шу

Тархьар[тоаде | тоаде чура]

Йиш хьахиларах Хамхой Ахьмада ше дувц:

«Цкъа мархаш доасташ, ЖӀайраха нийсделар тхо. Новкъосташца хьоашалгIа даха́ дагIача тхона гIулакх деш хьайзар тӀеххоза, эздел долаш йола йоI. Юххера, гIайтта тхоаш цигара дIадолхаш, цу йоIага айса илли яздергхиларах хоам бир аз. Яз а дир. Хаматханов Лорса йоI Лида яр из.»

Лорса́р (Хаматхананаькъан Лорсеи цун дезали) бахаш ДӀаьхача Къуха хиннаб. Лида цӀагӀа йоккхагӀа хиннай, хӀаьта из йоацаш кхы а 5 дезалхо хиннав. Ведажанаькъанга маьре яхай.

1944 шера гӀалгӀай мехках баьхача хана денз ерригача паччахьалкхе гӀалгӀай культура, масала, ашараш массанена хозаш лекхар могадеш хиннадац. 1953 шера Сталин венначул тӀехьагӀа «Лорса Лида» гӀалгӀай меттала йола хьалхара йиш хиннай радиога гӀолла лакхийтар[1].

2010 шера «Лоам» яхача гӀалгӀай мукъама тоабо лекхар из йиш, цул тӀехьагӀа кхы чӀоагӀагӀа гӀоръяьлар из.

Сакъердаме бакъдар[тоаде | тоаде чура]

Йиш араяьннача хана денз Лида яха цӀи техкар чӀоагӀагӀа даьржа хиннад, из йиш наха езаенна хиларга хьежжа.

Белгалдаккхар[тоаде | тоаде чура]

  1. Севриновский В. Тимур и его команда. etokavkaz.ru (4.02.2016). ТIехьара хьажар хиннад 2 Саькура 2022.

Литература[тоаде | тоаде чура]