Албаканаькъан МурцаӀалий Джабраьил

Албаканаькъан МурцаIалий Джабраьил
Албаканаькъан МурцаIалий Джабраьил
	Албаков Джабраил Мурцалович
Ваь таьрахь	2 бекарга 1940
Ваь моттиг	ГIалмисте, ГӀалме шахьар, Нохч-ГӀалгӀай АССР
Кхелха таьрахь	5 ардара 1968 (28 шу)
БӀорахол	СССР
Леладу гӀулакх	оазархо
Лостам	исбахьален литература
Жанр	оазарле
Кхолламий мотт	гӀалгӀай

Алба́канаькъан МурцаӀа́лий Джабраьил (эрс: Албаков Джабраил Мурцалович) — цӀихеза вола гӀалгӀай оазархо ва.

Биографи

Албаканаькъан Джабраьил ваьв 1940-ча шера бекарга бетта 2-гӀча дийнахьа ГӀалмисте. Диъ шу даьнна кӀаьнк хиннав из 1944-ча шера гӀалгӀай къам мехках доаккхача хана. Цун бера шераш дӀадахад, СибарегӀа бала а хало а ловш. Дешар ГӀиргӀизой мехка дӀадола а даь, цигга юххьанцара ишкол яьккхай цо. 1957-ча шера ГӀалгӀайче ше ваьча ГӀалмисте цӀавеначул тӀехьагӀа, цо дийша чакхъяьккхай юкъера ишкол. Цул тӀехьагӀа из Шолжа-ГӀалий тӀарча хьехархой института кийчон отделене деша эттав из. 1959-ча шера Нохч-ГӀалгӀай педагогически института тархьара-филологен факультете дӀахо дешар дӀадехьад Джабраьила. Цу факультете дешаш волча хана, оазарленцара хьашт совдоал цун. Байташ язъе а сурташ дехка а из дуккха хьалха, берий шерашка, волавенна хиннав^[1].

Албаканаькъан Джабраьила болх баьб Гадаборшакъонгий-Юрта юкъерча ишколе хьехархо волаш.

1968-ча шера ардара бетта 5-гӀча дийнахьа кхелхав из. Ӏилма Ӏомаде аьттув хиннача шерашка хала лазар кхийтта́ хиннад цох. Из лазар Джабраьилах кхетара бахьан гӀалгӀай къам СибарегӀа дахийтарца хоттаденна хиннад, цун йишас Лидас дувцачох. 1957-ча шера из ГӀиргӀизехьара Кавказе цӀавоагӀача хана, цунца цхьан цӀермашен чу нийсбенна хиннаб Дошлакъий-Юртара гӀалгӀай, шоай берашца цӀабоагӀаш. ЦӀермашен сеца́ча юкъа хьогденнача берашта хий эца дагахьа араваьннача тӀехьависа хиннав Джабраьил. Шийла, цӀайза Ӏан ди хиннад из. Дарзах удаш, халла тӀехьакхийнав, хӀаьта, тамбура чу шелваларо кхетам чура ваьккхав из. Цул тӀехьагӀа гучадаьннад ревматически полиартрит яха тӀехкашта хула лазар. Ийс шера из лазар ловш хиннав Джабраьил^[1].

Кхоллам

Ший байташ араяха из волавеннав 1960-ча шера. Уж каст-каста кепатохаш араювлаш хиннай «Сердало» газета тӀа а «Лоаман Ӏуйре» альманаха тӀа а. 1967-ча шера Нохч-ГӀалгӀай дешаргий зарбанчено кепатеха арабаьккхаб «Наьна кулгаш» яха оазархочун байтий гуллам. Цунна юкъеяхай тайп-тайпарча тематиках йола байташ. Иштта арадийнад дӀахо кхыдола балхаш: 1969-ча шера — «ГӀалмисте», 1985 шера — «Лоамашкара мух», 2003-ча шера — «ГӀалгӀайче, хьо еза сона» (поэт кхелхачул тӀехьагӀа). Иштта цун стихаш юкъеяхай гӀалгӀай поэзен антологена а^[2].

Белгалдаккхар

↑ ^1,0 ^1,1 Евлоева А. М., Мартазанова Х. М., 2011, оа. 524.
↑ С любовью к жизни / Мадина Оздоева, 2.04.2020.

Литература

Евлоева А.М., Мартазанова Х. М. ХӀанзара гӀалгӀай литература / Сост.И.А.Дахкильгов. — Нальчик : Республиканский полиграфкомбинат им. Революции 1905 г.», 2011. — 423 с.

ТӀатовжамаш

Оздоева М. С любовью к жизни (эрс.). газета «Ингушетия».

[_0c71367fe7a9f30e-1] 1,0 ^1,1 Евлоева А. М., Мартазанова Х. М., 2011, оа. 524.

[2] С любовью к жизни / Мадина Оздоева, 2.04.2020.

[1]

[2]