Дикача уйлаца пайда эцар

Дикача уйлаца пайда эцар е дикача уйлаца леладар (эрс: добросо́вестное испо́льзование, ингал: fair use) — бокъоний доктрина я Хетта Америкера Штаташка. Цо сурт оттаду кхоллама произведений авторашта низамо луш къаьстта йолча бокъонна доазув тохара́. Цу доктрино могаду, нагахь санна цхьацца белггала дола бехкамаш кхоачашдой, автора бокъоно лорадеш дола материалах лоӀаме пайда эцар. Термин fair use Хетта Америкерча Штаташка мара лелайиц, цхьабакъда англосаксонски бокъон раж йолча паччахьалкхенашка лелаю цунах тара йола термин — «дог цӀена долаш леладар» (честное использование, fair dealing).

Дикача уйлаца пайда эцар хилийта йиш я автора бокъоний доалахочунгара цхьаккха а даьккха пурам доацаш, амма из хила деза «Ӏилма а пайдане исбахьаленаш а дегӀадоаладар» духьа (ХАШ Конституцен 1-гӀча статьяй 8-гӀча раздела 8-гӀа пункт). Из тара дац авторий бокъоний объектах пайда эцара́ официальни (частни е публични) лицензи яларах. Дикача уйлаца пайда эцача хана авторий бокъонашта тохаш дола доазув (некоторые ограничения авторского права) тох йоах дош лоӀаме хилара духьа а, США Конституцен Хьалхарча тоадара́ тӀатайжа́ из деш хилар бахьан а. Иштта цу доктрина новкъосталца баланс лелаю произведенен доалахочунна хьашташтеи (интересы правообладателя) цу произведенен социальни а культурни а лоархӀам эшаш йолча юкъарлен хьашташтеи юкъе.